Војската на САД развива моќно ласерско оружје, најсмртоносното до сега

Војската на САД планира следната година да демонстрира ласерско оружје од 300 киловати, најмоќното до сега.

Оружјето со големина на контејнер поставено на камион се развива од General Atomics Electromagnetic Systems (GA-EMS) и Boeing.

„Ова компактно ласерско оружје со голема моќност ќе биде најсмртоносното досега“, изјави Скот Форни, претседател на GA-EMS.

Во 2014 година, американската морнарица го постави своето прво високо-енергетско ласерско оружје од 30 киловати на USS Ponce. Повеќето воени ласери се движат од 30 до 100 киловати, што е генерално доволно за соборување на помали беспилотни летала, така што ова ново оружје би требало да биде многу помоќно.

Вообичаено, таквото оружје се заснова на повеќе индустриски ласери чиј излез е комбиниран во еден зрак. Но, новиот ласер се базира на друга технологија и користи големи стаклени плочи поврзани во серија, пишува New Scientist.

Џастин Бронк од британската организација Royal United Services Institute верува дека таков ласер може да собори поголеми објекти, но и повеќе цели по ред.

„Овој ласер може да се брани од балистички ракети, како и од дронови, авиони и хеликоптери“, рече Бронк.