Машки клуб Светот на мажите
Шведскиот генетичар Сванте Паабо е овогодинешниот добитник на Нобеловата награда за медицина за, како што се смета, пионерски напор во користењето на древната ДНК за откривање непознати во човечката еволуција.
Нобеловиот комитет денеска објави дека Паабо го постигнал она што изгледало невозможно да се постигне, имено дека го секвенционирал првиот неандерталски геном и дека во таа прилика утврдил дека хомосапиенс се вкрстувал со неандерталците.
Неговото откритие беше објавено во 2010 година, откако тој беше пионер во методите за екстракција, секвенционирање и анализа на античка ДНК од коските на неандерталците. Благодарение на неговата работа, научниците можат да ги споредат геномите на неандерталците со оние на луѓето што живеат денес.
„Институционалното истражување на Пааб доведе до воспоставување на сосема нова научна дисциплина – палеогеномика. Со откривањето на генетските разлики меѓу живите луѓе и изумрените хоминини, неговите откритија се основа за истражување на она што нè прави единствени“, објасни комитетот.
Паабо откри дека повеќето луѓе денес споделуваат еден до четири отсто од нивната ДНК со неандерталците, што значи дека неандерталците и хомосапиените мора да се вкрстувале и имале потомство пред неандерталците да изумрат пред 40.000 години.
Овој шведски генетичар бил директор на германскиот институт за еволутивна антропологија Макс Планк и истражувач во Природонаучниот музеј во Лондон, пренесува CNN.
