“La tomatina” фестивалот во Шпанија

Народ прекриен со црвени домати во Буњол, Шпанија. Секој сака добра забава, но забавата со летачките домати е нешто специфично, несекојдневно. Огромна тепачка со храна.
Она што започна како мавање со храна меѓу пријатели во далечната 1945 година, прерасна во културална манифестација и светски најголемата тепачка со храна.
Фестивалот се случува секоја година, последната среда во август. Го посетуваат и над 30000 учесници.
Почнува рано наутро, огромен број на учесници пристигнуваат со возови од Валенсија во Буњол. Пристигнуваат и се упатуваат кон центарот, со застанувања за храна и пијалок. Сите пристигнуваат во центарот и едноставно застануваат. Гужвата едноставно е прегуста.
За време на загревањето за големата случка, учесници учествуваат во качување на вискои бандери кои се мрсни и премачкани со храна, а поентата на качувањето е да се симне големата шунка од врвот на бандерата, со што официјално започнува фестивалот на мавање со домати.
Што и да се каже за чудниов фестивал нема да го оправда огромното унишување на храна, но едноставно поентата на фестивалот е опуштање од секојдневните стресови. Чуден некој начин.
Борбата со домати трае околу еден час, после што градот е до глуждови во сок од домати. Набрзо по завршувањето на фестивалот на терен излегува противпожарната бригада и со црева со вода и помош од цитричната киселина од доматите одлично го чистат местото. Забавата продолжува подолу кај реката за да се измијат и исперат остатоците од домати. Потоа се продолжува во околните кафеани исполнети со забава , музика и смеа се до зајдисонце кога поголемиот дел од учесниците се враќаат во Валенсија со воз.
Неколку смерници доколку решите да го посетите фестивалот:
Буњол е лоциран на околу 40 километри надвор од Валенсија, и има три начина како да се дојде до таму.

• Со кола за 40 минути возење. Може да си изрентате автомобил од локалните рент-а-кар компании.
• Со  автобус патувањето трае 60-75 минути и може да ги користите автобусите со број 265a, 265b, и 2 . Повратниот билет ќе ве чини под 8 евра.
• Со воз патувањето е нешто над еден час и ќе ве чини околу 8 евра за повратен билет.

Од 2013 година странските туристи што сакаат да учествуваат на фестивалот мора да платат билет кој чини 10 евра.