Aston Martin DB5 од филмот за Џејмс Бонд излегува на аукција

Aston Martin DB5, кој беше користен за време на снимањето на филмот „No Time To Die“ за британскиот агент Џејмс Бонд, ќе биде продаден на аукција.

Аукцијата ја организира Кристи, а колекционерите и другите потенцијални купувачи имаат одлична можност да поседуваат навистина уникатен предмет. Каросеријата е изработена од карбонски влакна и обоена во класичната боја Silver Birch. Интересно е што автомобилот го придвижува 3,2-литарски директен-шест од BMW M3 (E46).

Во внатрешноста има спортски седишта и појаси, како и заштитен кафез и хидраулична рачна сопирачка. Модифициран е и издувниот систем за автомобилот да звучи колку што е можно слично на моделот Aston Martin DB5.

Инаку, естетиката на автомобилот е речиси беспрекорна. За снимањето на филмот се направени осум реплики, а на продажба е понудена само оваа. Според тоа, се проценува дека новиот купувач ќе одвои околу 2,4 милиони долари.

Аукцијата ќе започне на 15 септември, а ќе заврши на 5 октомври. Собраните средства ќе бидат донирани за помош на 45 хуманитарни организации.