Францускиот Формула 1 тим загуби двајца возачи за 24 часа

Алпине објави дека во 2023 година за нивниот тим ќе вози Оскар Пјастри наместо Фернандо Алонсо, кој изненадувачки ја потврди својата преселба во Астон Мартин. Но, следеше нов шок за францускиот тим во Формула 1 за неполни 24 часа.

Имено, 21-годишниот Австралиец преку социјалните мрежи објави дека следната година нема да вози за Алпине.

“Alpine F1 издаде изјава без моја согласност во која вели дека ќе возам за нив следната година. Ова е неточно бидејќи немам потпишано договор со Alpine за 2023 година. Нема да возам за Alpine следната година”, напиша талентираниот австралиски возач. .
Инаку, Пјастри е производ на возачката академија на Алпине, каде пристигна во 2019 година по освојувањето на титулата во Формула Рено Еврокупот.

Австралиецот беше најдобар возач во Формула 3 следната сезона, за да го освои шампионатот во Формула 2 во 2021 година.
Во францускиот тим, Пјастрија ја доби улогата на втор возач, покрај Французинот Естебан Окон, кој е во тимот од 2020 година и моментално е на осмото место во пласманот на Светскиот шампионат во Формула 1.

Да потсетиме, утринава предводникот на Алпине, Отмар Шафнауер на прес-конференција потврди дека разделбата со Алонсо е поради тоа што не можеле да се договорат за должината на новиот договор.