Официјалната опрема на олимпијците од Јапонија ќе биде изработена од рециклирана облека

Компанијата за производство на спортска опрема “Asics” ќе почне со рециклирање на стара облека и од неа ќе ја изработува опремата за јапонските олимпијци и параолимпијци.
Јапонските олимпијци опремата ќе ја носат на Олимписките игри во Токио следната година, а од “Asics” се надеваат дека со кутиите поставени низ продавниците и спортските настани ќе успеат да соберат 30.000 парчиња облека.
Овој чекор на компанијата доаѓа во време кога модната индустрија е под притисок за употреба на рециклирани материјали заради заштита на околината и почитување на се повисоките еколошки стандарди.
Од “Asics” соопштија дека опремата ќе биде изработена од полиестер добиен од донираната и рециклирана облека. Останатите продукти добиени при рециклирањето на облеката, по одделувањето на полиестерот ќе бидат употребени како гориво за одредени процеси.
Модната индустрија исто така е под притисок и заради отпадот што го продуцира, а со тоа и на влијанието на климатските промени. Брендови како “Burberry” се на удар заради политиката на уништување на облеката што нема да се продаде како механизам за заштита од кражба и продавање по ниски цени.
Од Организацијата на обединети нации велат дека 10% од загадувањето го продуцира модната индустрија.