Професионалниот кошаркарски тим во НБА, Феникс Санс лани играше во големото финале на плеј-офот и годинава имаше најдобар сооднос победи-порази, а сега ќе го менуваат сопственикот.
Имено, сопственикот на Санс, Роберт Сарвер изјави дека бара купувачи откако лигата го суспендираше на една година.
Сарвер е казнет и финансиски со 10 милиони долари, сето тоа поради расистички коментари и непримерен јазик и „сексистичко однесување“ кон вработените.
„Зборовите за кои длабоко жалам ги засенија две децении градење организации кои ја зајакнаа целата област Феникс. Како верник, верувам во патот на простувањето, но во сегашната клима која не простува, ми стана болно јасно дека тоа не е можно Што и да е добро што сум го направил или би го направил, останува во сенка на она што го кажав во минатото. Затоа, го започнав процесот на барање купувачи и за Санс и за тимот на ВНБА Меркјури“, објави Сарвер.
Да потсетиме, Сарвер ги купи Санс во 2004 година за 401 милион долари, а моменталната вредност на клубот се проценува на 1,8 милијарди долари.