Машки клуб Светот на мажите
Alexander I е тврдина која е изградена на вештачки создаден остров во далечната 1845 година и во потполност е опкружен со вода или мраз, во зависност од годишното време.
Островот е вештачки создаден со забивање на греди во дното на морето и потоа е полнет и граден со бетон, гранит и песок за да ја издржи тежината на воената база.
Низ времињата, Alexander I била морнарички извиднички пункт, место на кое истурале отпад, место каде што се одржувале забранети рејв забави, но најпозната е по тоа што била место каде што е откриена вакцината против најсмртоносната болест на сите времиња – чумата.
Тврдината никогаш не била користена како корисно воено утврдување и тука била сместена воената база за истражување, истражувачкиот центар и лабораторијата.
Кон крајот на деветнаесетиот век (1884 година) Александар Јерсин го открил патогенот на чумата, а руската влада веднаш оформила специјална комисија за превенција од ширење на болести и научен тим кој ќе се бави со бактериологија.
Изолираноста на тврдината се покажала како исклучително корисна за сместување на научниците и за нивната работа. Лабораториите почнале да функционираат во 1897 година и биле дел од Царскиот институт за експериментална медицина.
Комплексот содржел многу објекти, големи печки за кремирање на животните на кои се вршеле тестирањата, изолациски простории, библиотека и коњушници во кои се чувале коњите на кои се тестирала вакцината. Развојот на вакцини била главната функција на центарот, а се верува дека се вршени тестови за вакцини против колера, тетанус, тифус и серија инфекции од стафилококи и стрептококи.
Работата и престојот во ова место не биле ни најмалку безопасни. На неколку наврати се појавувале мали епидемии од чумата во период од 1904-1907 година.
Откако власта во Русија ја презеле комунистите локацијата е затворена, а експертите се прераспоредени на други локации низ државата.
Денес на тоа место руската морнарица врши поправки на своите пловила и има свои магацини, а местото може да се посети туристички.
